Oʻrtacha chekni koʻtarib savdoni oshiramiz

Dunyo boʻylab biznesda oʻrtacha chekni oshirish uchun quyidagi 5 ta usuldan unumli foydalaniladi:

Cross-sell — yoniga qoʻshib sotish

Mijoz tanlagan asosiy buyumga mos, unga kerakli boshqa kichik narsalarni ham taklif qiling.

Masalan, xaridor yangi telefon sotib olganida unga chiroyli gʻilof va himoya oynasi ham taklif qilinadi.

Upsell — yaxshiroq va kattarogʻini taklif qilish

Mijozga u tanlagan narsadan koʻra sifatli va foydali, lekin sal qimmatroq variantni koʻrsating.

Unga nima uchun koʻproq pul toʻlash foydali ekanini tushuntiring. Masalan, mijoz kichkina qadoqdagi sharbat olmoqchi.

Siz unga: “Kichkinasi 10 000 soʻm, lekin 2 barobar koʻp hajmdagisi bor-yoʻgʻi 15 000 soʻm. Kattasini olsangiz, pulingiz ancha tejaladi va butun oilangizga yetadi” deb tushuntirasiz.

Komplekt — “Hammasi birda” toʻplamlari

Bir-biriga mos mahsulotlarni bitta chiroyli quti yoki toʻplam qilib soting. Odamlar tayyor va arzonroq toʻplamlarni yaxshi koʻrishadi.

Toʻplam ichidagi narsalarni birga hisoblaganda, alohida sotib olgandan koʻra arzonroq narx belgilang.

Masalan, shampun, soch balzami va dush geli. Ularni alohida sotganda jami 60 000 soʻm boʻlsa, chiroyli lentacha bilan bogʻlab, “Goʻzallik toʻplami — 50 000 soʻm” deb soting.

Katta xarid uchun chegirma

Mijoz maʼlum bir summadan koʻp pul xarajat qilsa, unga umumiy narxdan chegirma bering. Bu odamlarni ataylab koʻproq narsa olishga qiziqtiradi.

Masalan, “200 000 soʻmdan koʻp xarid qiling va jami summadan 5% chegirma oling!” degan eʼlon qoʻying.

Kassaga 170 000 soʻmlik narsa koʻtarib kelgan mijoz yana 30 000 soʻmlik narsa qoʻshib oladi. Chunki u chegirmaga ega boʻlgisi keladi.

Bepul yetkazib berish yoki sovgʻa chegarasi

Biz bepul narsalar yoki sovgʻalarni juda yaxshi koʻramiz. Shuning uchun maʼlum bir summadan oʻtganda bepul xizmat yoki qoʻshimcha sovgʻa taklif qiling.

Masalan, “300 000 soʻmdan oshiq xarid qilsangiz, uyingizgacha yetkazib berish bepul!” deng yoki boshqa mahsulotni bepul sovgʻa qiling.

Mijoz olgan mahsulotlari 250 000 soʻm boʻlsa, yetkazib berish puliga kuyib ketgandan koʻra oʻsha pulga yana bitta foydali mahsulot sotib olishni afzal koʻradi.